ക്ഷേത്ര പ്രവേശന വിളംബരത്തിനു നൂറ്റാണ്ടുകള്‍ക്കു മുമ്പേ ജാതിഭേദമോ സ്ത്രീ പുരുഷഭേദമോ കൂടാതെ എല്ലാവര്‍ക്കും പ്രവേശിച്ച് ആരാധന നടത്താന്‍ കഴിഞ്ഞിരുന്നത് ഓച്ചിറയില്‍ മാത്രമാണ്. ഓച്ചിറയും അതുള്‍ക്കൊള്ളുന്ന കരുനാഗപ്പള്ളി താലൂക്കും സമീപസ്ഥലങ്ങളായ കാര്‍ത്തികപ്പള്ളി, മാവേലിക്കര താലൂക്കുകളും ഒരു കാലത്ത് ബുദ്ധമതത്തിന് വളരെയേറെ പ്രചാരം സിദ്ധിച്ചിരുന്ന പ്രദേശമായിരുന്നുവെന്നും ഓച്ചിറ പ്രധാനപ്പെട്ട ബുദ്ധവിഹാര കേന്ദ്രമായിരുന്നുവെന്നുമാണ് ചരിത്രകാരന്‍മാരുടെ അഭിപ്രായം. ഓച്ചിറയും പരിസര പ്രദേശങ്ങളിലുള്ള ബുദ്ധമത സംസ്കാരാവശിഷ്ടങ്ങളും പള്ളി എന്നവസാനിക്കുന്ന സ്ഥലനാമങ്ങളുടെ ബാഹുല്യവും (ഉദാ: കരുനാഗപ്പള്ളി, കാര്‍ത്തികപ്പളളി, പുതുപ്പള്ളി, മൈനാഗപ്പള്ളി, മണപ്പള്ളി, കൊറ്റമ്പള്ളി, കുറുങ്ങപ്പള്ളി, വന്ദികപ്പള്ളി) ഇതിനുപോല്‍ബലകമായി ചൂണ്ടികാണിക്കപ്പെടുന്നു. നൂറ്റാണ്ടുകള്‍ക്കു മുമ്പുതന്നെ ജാതിവ്യത്യാസമില്ലാതെ ക്ഷേത്രത്തിലേക്ക് ആളുകള്‍ ആരാധനയ്ക്കായി എത്തിയതിനു കാരണവും ഈ ബുദ്ധമത സ്വാധീനമായിരിക്കാമെന്ന് കരുതപ്പെടുന്നു.

ഓച്ചിറയിലും പരിസരത്തുമായി താമസിക്കുന്ന വീരശൈവരും അവര്‍ക്ക് ക്ഷേത്രത്തിലുള്ള ചില അവകാശങ്ങളും ചരിത്രകാരന്മാരുടെ കൌതുകത്തെ തൊട്ടുണര്‍ത്തുന്നവയാണ്. പതിനൊന്നാം നൂറ്റാണ്ടില്‍ കര്‍ണ്ണാടകത്തില്‍ സ്ഥാപിക്കപ്പെട്ട വീരശൈവത്തിന്റെ ബ്രഹ്മ സങ്കല്പവും ഓച്ചിറ ക്ഷേത്രവുമായി വീരശൈവര്‍ക്കുള്ള ബന്ധവും കണക്കിലെടുത്താല്‍ ആദ്യകാലത്തു തന്നെ ഈ മതവുമായി ഓച്ചിറയ്ക്ക് ബന്ധമുണ്ടായിരുന്നു എന്നു കാണാം. ആയോധനകലയുടെ മുഴുവന്‍ കരുത്തും സൗന്ദര്യവും സമന്വയിപ്പിച്ച് ആണ്ടോടാണ്ട് നടത്തിവരുന്ന ഓച്ചിറക്കളിയും ഏതോ ചരിത്ര പാരമ്പര്യത്തിന്റെ ഓര്‍മ്മ പുതുക്കലായാണ് ഗണിക്കപ്പെടുന്നത്. നിരവധി ഐതിഹ്യങ്ങള്‍ ഇതുസംബന്ധിച്ച് പ്രചാരത്തിലുണ്ടെങ്കിലും തിരുവിതാംകൂറിന്റെ രൂപീകരണവുമായി ബന്ധപ്പെട്ട് പടനിലത്തു നടന്ന യുദ്ധത്തെ അനുസ്മരിപ്പിക്കുന്നതാണ് ഓച്ചിറക്കളി എന്ന അഭിപ്രായത്തിനാണ് മുന്‍തൂക്കം. ഓച്ചിറ ക്ഷേത്രവുമായി ബന്ധപ്പെട്ട ഐതിഹ്യങ്ങളും മറ്റും നിരവധിയാണ്. ഏതായാലും ഐതിഹ്യങ്ങളിലും തിരുവിതാംകൂര്‍ ചരിത്രത്തിലും മിഴിവോടെ പ്രത്യക്ഷപ്പെടുന്ന സ്ഥലമാണ് ഓച്ചിറ.

തമിഴ് സംഭാഷണത്തിന്റെയും പാട്ടിന്റെയും അതിപ്രസരമുണ്ടായിരുന്ന സംഗീത നാടകങ്ങളില്‍ നിന്നും ശുദ്ധമലയാള ഗദ്യസംഭാഷണമുള്ള നാടകത്തിലേക്ക് നാടകവേദിയെ കൈപിടിച്ചാനയിച്ചത് ഓച്ചിറക്കാരാണ്. സ്വാമി ബ്രഹ്മവ്രതന്റെ ശിക്ഷണത്തില്‍ ഓച്ചിറ പരബ്രഹ്മോദയ നടനസഭ അവതരിപ്പിച്ച പ്രശ്സതമായ ‘കരുണ’ യാണ് ഇത്തരത്തിലുള്ള ആദ്യനാടകം. ഇതിലെ ‘വാസവദത്ത’യെ രംഗത്തവതരിപ്പിച്ച ഓച്ചിറ വേലുക്കുട്ടി എക്കാലത്തെയും മഹാന്മാരായ നടന്മാരില്‍ ഒരാളാണ്. പരബ്രഹ്മോദയ നടനസഭ ഒരുക്കിയ പശ്ചാത്തലത്തില്‍ നിന്നും ഊര്‍ജ്ജം ഉള്‍കൊണ്ടാണ് കെ.പി.എ.സി മലയാള നാടകവേദിയെ ജനകീയമാക്കുന്നതിന് തുടക്കമിട്ടത്. ഇന്നും നാടകരംഗങ്ങളിൽ മുന്നിൽ നില്‍ക്കുന്ന ഓച്ചിറ ഇപ്പോൾ വിദ്യാഭ്യാസരംഗത്ത്‌ പുരോഗതിയാർജ്ജിച്ചു കഴിഞ്ഞെങ്കിലും ഈ ഗ്രാമം എല്ലാ മേഖലയിലും ഒരായിരം പടികൾ കയറി ഉയരങ്ങളിലേക്ക്‌ എത്തച്ചേരുമെന്ന്‌ പ്രതീക്ഷിക്കാം.