തൊടിയൂര്‍ എന്ന ശാന്തസുന്ദരമായ ഗ്രാമത്തില്‍ കല്ലേലിഭാഗം, മുഴങ്ങാടി, പുലിയൂര്‍വഞ്ചി, വേങ്ങറ തുടങ്ങിയ സ്ഥലങ്ങള്‍ ഉള്‍ക്കൊള്ളുന്നു. തൊടിയൂര്‍ ഗ്രാമപഞ്ചായത്തിലെ കല്ലേലിഭാഗം കുളങ്ങരയ്‌ക്കല്‍ മുളമൂട്ടില്‍ കുടുംബത്തില്‍ ശ്രീനാരായണഗുരു വന്നതില്‍ ഈ പ്രദേശം ധന്യമായി. ഹരിജനങ്ങള്‍ക്കായി അയ്യങ്കാളി ഇവിടെയെത്തി തിരുവിതാംകൂറിലെ ആദ്യത്തെ ഹരിജന വിദ്യാലയമാണ്‌ ഇന്നത്തെ തൊടിയൂര്‍ ഗവ:എല്‍.പി.സ്‌ക്കൂള്‍.

കായംകുളം രാജാവിന്റെ അധീനതയില്‍ ആയിരുന്നതും ഓണാട്ടുകര പ്രദേശത്തിന്റെ ഭാഗമിയിരുന്ന തൊടിയൂര്‍ എന്ന മതസൗഹാര്‍ദ്ദവും സാഹോദര്യവും പുലര്‍ത്തുന്ന ഈ ഗ്രാമത്തില്‍ വളരെ പ്രശസ്‌തമായ സാംസ്‌ക്കാരിക സ്ഥാപനങ്ങളും വിദ്യാഭ്യാസ സ്ഥാപനങ്ങളും പ്രവർത്തിക്കുന്നു.

കായംകുളം രാജാവിന്റെ വിശ്വസ്ത സേനാനായകന്‍ ആയിരുന്ന പുളിയ്ക്കല്‍ മേനവന്റെ നേതൃത്വത്തിലുള്ള ‘പുളിയ്ക്കല്‍ കോട്ട’ ഈ ഗ്രാമത്തിന്റെ ഐതിഹാസിക ചരിത്ര സ്മാരകമായി നിലകൊണ്ടിരുന്നു. ഈ സ്മരണകള്‍ ഉണര്‍ത്തിക്കൊണ്ട് പുളിയ്ക്കല്‍ കോട്ട സ്കൂള്‍ (തൊടിയൂര്‍ ഗവണ്‍മെന്റ് എല്‍ പി എസ്സ്) ഈ പഞ്ചായത്തിന്റെ മദ്ധ്യഭാഗത്തായി സ്ഥിതി ചെയ്യുന്നു.

ചരിത്രത്തില്‍ നിറഞ്ഞുനില്‍ക്കുന്ന വളരെ പ്രസിദ്ധമായ ക്ഷേത്രമാണ് മാരാരിത്തോട്ടം ക്ഷേത്രം. മാരദഹനം കഴിഞ്ഞ് ശിവന്‍ കുടികൊണ്ട സ്ഥലമാണ് മാരാരിത്തോട്ടം എന്ന് ഐതിഹ്യം. വടക്കുനിന്നും ശിവനെ ഭയന്ന് കാമദേവന്‍ വലിയ ശബ്ദം മുഴക്കിക്കൊണ്ട് ഓടിവന്ന സ്ഥലത്തെ മുഴങ്ങോടി എന്നും, കാമന്റെ പട്ടട ഒരുക്കിയ സ്ഥലത്തെ പട്ടതടവ് എന്നും, പട്ടടയില്‍ നിന്നും ചാമ്പല്‍ വാരി ഒഴുക്കിയ സ്ഥലത്തെ ചാമ്പക്കടവ് എന്നും അറിയപ്പെടുന്നു എന്നാണ് പഴമക്കാര്‍ പറയുന്നത്.

ചെങ്ങന്നൂരിന് അടുത്തുള്ള പുലിയൂര്‍ എന്ന സ്ഥലത്തു നിന്നും വഞ്ചിയില്‍ കയറിവന്ന ബ്രാഹ്മണര്‍ അധിവസിച്ചിരുന്ന സ്ഥലത്തെ പില്‍ക്കാലത്ത് പുലിയൂര്‍ വഞ്ചി എന്ന് അറിയപ്പെട്ടിരുന്നു എന്നും, അവരുടെ കുടുംബ ക്ഷേത്രമായിരുന്നു ഇടക്കുളങ്ങര ദേവീക്ഷേത്രം എന്നും വിശ്വസിക്കുന്നു. ‘മാല’ എന്ന പേരുകാരിയായ ഒരു അവര്‍ണ്ണ സ്ത്രീയ്ക്ക് പുഞ്ചവയലില്‍ നിന്നും ലഭിച്ച ദേവീവിഗ്രഹം അതിനടുത്തുള്ള പുരയിടത്തില്‍ സ്ഥാപിച്ചെന്നും, അതുവഴി ആ പ്രദേശത്തെ മാലുമേല്‍ എന്നും അറിയപ്പെടാന്‍ കാരണമായതായി പറയപ്പെടുന്നു. വിഗ്രഹം കണ്ടെടുത്ത പുഞ്ചവയലിനെ ‘ഭഗവതിക്കണ്ടം’ എന്ന പേരില്‍ ഇപ്പോള്‍ അറിയപ്പെടുന്നു.